Editionstext
Mommsen 101. Die Herzoge Albrecht und Leopold von Österreich bestätigen der Stadt Schaffhausen ihre Freiheiten
1373 Dezember 3. Wien
Wir Albrecht und Leupolt brueder, von gots gnaden hertzogen ze Oesterrich, ze Steyr, ze Kernden und ze Krain, herren auf der Windischen Marich und ze Portnaw, grafen ze Habspurg, ze Tyrol, ze Phyrt und ze Kyburg, marggrafen ze Burgouw und lantgrafen in Elsazze, bekennen und tuon chunt offenlich mit disem brief allen den, die in sehent, lesent oder horent lesen nu oder hienach in kûnftigen zeiten, daz wir genêdiklich angesehen haben die lauttern trew und sunder begierd, so die erbern unser sunderlieben der schultheizz, der rate und die purger gemainlich der stat ze Schafhusen, die von dem heiligen Roemischen reich unser und unser erben phant sind, gegen unsern vorvordern und auch gegen uns steat ertzaigt und gehebt und auch die manigvaltigen nutz, dienste, die si uns getan habent und fûrbas wol getuon mûgent, und haben fûr uns und unser erben in, iren nachkomen und der stat vernewet und bestêtt, vernewen und bestêtten auch wizzentlich mit kraft ditz briefs alle die recht, genade, freiheitte und guote gewonhaitt, die sie von Roemischen keysern und kûnigen gehebt und herbracht habent untz auf die zeit, als sie in unser gewalt komen und von dem Roemischen reich unsern vorvarn versetzet sind und die in auch unser vorvordern bestêtt und vernewet habent an alles geverd. Und darûber ze merer sicherheit und gezeugnûzz hiezzen wir unsere insigel henken an disen brief, der geben ist ze Wienn, an samztag vor sand Niclas tag, nach Kristes gepurd dreutzehen hundert jaren, darnach in dem drei und sibentzgisten iare.
Original: Urk. 1012. Perg. 32:16,2 cm. Ohne Kanzleivermerke. An Pergamentstreifen hängen die Siegel der Urkunder, das Siegel Albrechts ist am Rande stark beschädigt, dasjenige Leopolds ist sehr gut erhalten.
Kopien: Abschriften 1 fol. 6 und 7 (zeitgenössisch).
Regest: UR 1012.
Es dürfte sich ebenfalls um die Erneuerung eines verbrannten Privilegs handeln.